وزارت خارجه افغانستان اعلام کرد که به زودی ده ها زندانی افغان از تاجیکستان به افغانستان انتقال داده میشوند.
شکیب مستغنی سخنگوی این وزارت گفت: سفارت افغانستان در دوشنبه، هفتهی گذشته در این مورد با مقامهای تاجیکستان صحبت کرده و آنان برای تحویلدهی این زندانیان ابراز آمادگی کردهاند.
وی افزود: وزارت خارجه این موضوع را بهتازگی با وزارت داخله در میان گذاشته و این وزارت، برای تحویلگیری این زندانیان ابراز آمادگی کرده است.
هنوز دقیقا مشخص نیست این زندانیان در چه تاریخی به افغانستان تحویل داده میشوند؛ اما سفیر افغانستان مقیم تاجیکستان هفتهی آینده در این زمینه با مقامهای تاجیکستان گفتوگو میکند.
این در حالیست که شماری از شهروندان ولایتهای تخار، قندوز و بدخشان برای کار وارد تاجیکستان میشوند؛ و در این میان تعدادی مواد مخدر قاچاق میکنند.
در جریان سالهای گذشته تعدادی از کارگران و قاچاقبران هنگام عبور از سرحدات سه ولایت یادشده، توسط پولیس تاجیکستان بازداشت شدهاند.
آمار دقیقی وجود ندارد که در حال حاضر چه تعداد شهروندان افغان در تاجیکستان زندانی اند؛ اما افغانستان و تاجیکستان در سال 2006 موافقتنامهی تبادله محکومان به حبس را امضا کردند.
مطابق این توافقنامه، در سال ٢٠١٠ میلادى ٢۵۵ افغان محکوم به زندان، از تاجیکستان به افغانستان انتقال داده شدند.
از سوی دیگر، هشت شهروند تاجیکستان در زندان افغانستان نیز برای سپری نمودن دوران باقیماندهی محکومیتشان، به تاجیکستان تحویل داده شدهاند.
در اوایل سال ٢٠١٣ هیأتی از سوی حکومت افغانستان به شهر دوشنبه سفر کرد و در این سفر، در مورد 100 زندانی افغان در تاجیکستان به توافقهایی دست یافت.