کنسولگری تاجیکستان با حضور مقامات محلی بلخ و شماری از دیپلومات های خارجی بیست و چهارمین سالروز استقلال کشورش را در بلخ تجلیل نمود.
مصطفی اکه کنسول تاجیکستان در این مراسم گفت که این کشور از چند دهه قبل در بخش های سیاسی، اقتصادی، فرهنگی و اجتماعی با افغانستان همکار بوده است.
به گفته او ایجاد پنج پل در مرز افغانستان و تاجیکستان ، انتقال برق 220 ولت به شمال افغانستان و راه اندازی نشست های منطقه یی برای بهبود اوضاع اقتصادی از جمله همکاری های کشور تاجکستان با افغانستان است.
عطا محمد نور سرپرست ولایت بلخ در پیام از همکاری های کشور تاجکستان در عرصه های مختلف قدر دانی نموده خواستار همکاری دوامدار آن کشور دربخش پروژه های انکشافی و بازسازی در افغانستان بخصوص ولایت بلخ شده است.
در کنار فرهنگ و زبان مشترک ، در یک دهه اخیر انرژی ، ترانزیت و تجارت نیز به عناصر مهم رابطه میان تاجکستان و افغانستان مبدل شده است.
تاجکستان با حدود 1300 کیلو متر مرز مشترک پس از پاکستان طولانی ترین مرز را با افغانستان دارد مرز افغانستان و تاجکستان در قرن نوزده میان روسیه تزاری، بریتانیا و دولت آن زمان افغانستان مشخص شد.
