رئیس مرکز تحقیقات استراتژیک رئیس جمهور تاجیکستان در واکنش به برخی گزارش‌ها مبنی بر حمایت این کشور از طالبان اعلام کرد که دولت کشورش تنها حکومت مشروع در افغانستان را به رسمیت می‌شناسد.
خدای بردی خالق نظراف رئیس مرکز تحقیقات استراتژیک رئیس جمهور تاجیکستان اظهارداشت که دولت دوشنبه با گروههای مخالف دولت افغانستان مذاکره نمی‌کند.
وی در یک نشست خبری اعلام کرد که کشورش تنها حکومت مشروع در افغانستان را به رسمیت می‌شناسد و با هیچ گروه دیگری در خاک این کشور مذاکره نمی‌کند.
اوایل سال جاری یکی از مشاوران اشرف غنی که نخواسته نامش فاش شود گفته بود که تاجیکستان نقش مهمی در ارتباط دیپلماتیک روسیه و طالبان افغانستان دارد.
به گفته این مقام دولتی افغانستان، گروه طالبان همواره برای به رسمیت شناخته شدن توسط جامعه بین‌المللی تلاش می‌کند.
بر اساس این گزارش، سفیر روسیه در کابل گفته است که روسیه با طالبان ارتباط دارد اما هیچ کمکی به آن ها نکرده است.
از سویی دیگر مقامات تاجیکستان در مورد ادعاهای مقامات افغان مبنی بر تعمیر سلاح‌های سنگین طالبان در این کشور اعلام کرده بودند که این ادعاها بی اساس است.
محمد جان اولوغ خوجایف سخنگوی گارد مرزی تاجیکستان گفته بود که ادعاهای مقامات افغان بی‌اساس است اما در این باره تحقیق می‌کند.
مقامات سابق دولت افغانستان چندی قبل اعلام کرده بودند که وسایل نقلیه زرهی که پس از سقوط ولایت قندوز به دست طالبان افغان افتاده است، برای ترمیم توسط متخصصان روسی به تاجیکستان منتقل می‌شوند.
وحید مژده در این باره گفته بود که روسیه نمی‌خواهد به عنوان حامی طالبان جلوه کند، زیرا روابط خوبی با کابل دارد.
