بررسی امنیت افغانستان توسط شانگهای و تاجیکستان
/29.7.2014
امروز صبح سراج الدین اصل اف؛ وزیر امور خارجه تاجیکستان و ژانگ سینفین؛ مدیر کمیته اجرایی ضد تروریستی سازمان همکاری شانگهای، طی دیداری امنیت افغانستان را به بررسی گرفتند. این دیدار در دوشنبه پایتخت تاجیکستان انجام شد.
در این دیدار وزیر خارجه تاجیکستان از گسترش همکاری ها با کشورهای عضو سازمان شانگهای به منظور مقابله با تروریسم و افراط گرایی در منطقه استقبال کرد.
وی گفت که تاجیکستان تلاش می کند نقش بسزایی در مبارزه با تروریسم داشته باشد.
تاجیکستان در مبارزه با تروریسم در سازمان همکاری شانگهای از نقش بسزایی برخوردار است. این کشور با توجه به اینکه با افغانستان همسایه است می تواند با تقویت مرزهای خود، از ورود افراط گرایان و تروریستان به منطقه جلوگیری کند.
افزایش تروریسم و افراط گرایان در منطقه با خروج نیروهای خارجی از افغانستان از جمله نگرانی های شانگهای است.
سازمان همکاری های شانگهای در سال 2001 با عضویت چین، روسیه، قزاقستان، قرقیزستان، تاجیکستان و ازبکستان تاسیس شد.
این کشورها با هدف تقویت اعتماد متقابل و خلع سلاح در مرزهای طولانی خود، سازمان شانگهای را تشکیل دادند.
|