برگزاری رزمایش نظامی روسیه در مرز افغانستان
/16.9.2014
نظامیان روس مستقر در مرز تاجیکستان نزدیک به افغانستان روز گذشته یک رزمایش نظامی بزرگ را برگزار کرد.
نظامیان کشور روسیه مستقر در مرز تاجیکستان این رزمایش را با هدف آمادگی در مقابله با تروریستان و جنگجویان انجام دادند.
طبق گفته های مقامات نظامی روسیه در این رزمایش بیش از یک هزار نفر شرکت داشتند.
در این رزمایش از جنگنده های بدون پیلوت استفاده شد که در ارتفاع 100 تا 150 متری پرواز می کردند .
پایگاه نظامی 201 روسیه با هفت هزار نیروی نظامی در شهرهای دوشنبه، قورغان تپه و کولاب در کشور تاجیکستان استقرار یافته است.
زمانی که تاجیکستان وابسته به اتحاد جماهیر شوروی سابق بود لشکر 201 این کشور در تاجیکستان مستقر بود.
توافقنامه تمدید استقرار پایگاه نظامی 201 روسیه در خاک تاجیکستان امسال در پارلمان تاجیکستان به تصویب نهایی رسید.
براساس این توافقنامه، این پایگاه نظامی تا سال 2042 در خاک تاجیکستان باقی خواهد ماند که در مجموع حضور نظامی روسیه در تاجیکستان از سال 1993 تا آن زمان به 49 سال خواهد رسید.
کمک به نوسازی تسلیحات ارتش تاجیکستان، مساعدت مسکو به مهاجران تاجیک ها به روسیه و معافیت گمرکی صادرات مواد سوختی به تاجیکستان ازجمله وعده هایی است که روسیه در مقابل تمدید توافقنامه میزبانی تاجیکستان از پایگاه 201 تا سال 2042 به تاجیکان داده است.
از طرفی مقامات هر دو کشور حضور این پایگاه را عامل تامین ثبات امنیت در منطقه ارزیابی می کنند.
|