مقامات سه کشور تاجیکستان، افغانستان و پاکستان روز گذشته عصر طی یک دیدار در اسلام آباد بر گسترش روابط ترانزیتی توافق کردند.
مقامات افغانستان، پاکستان و تاجیکستان طی نشستی تصمیم گرفته اند که روند مشورت دهی و گفتگو ها در مورد توافقنامه ترانزیت تجاری را افزایش دهند .
نخستین نشست برای گفتگو در مورد جزئیات این توافقنامه سه جانبه در اسلام آباد برگزار شد.
شهزاد عرب؛ وزیر تجارت پاکستان ، مزمل شینواری؛ سرپرست وزارت تجارت افغانستان و سید رحمان؛ معاون وزیر تجارت تاجیکستان حضور داشتند .
توافقنامه ترانزیت تجارتی سه جانبه میان افغانستان، پاکستان و تاجیکستان در ماه مارچ سال جاری در کابل امضا خواهد شد .
این توافقنامه سه جانبه به عنوان یک گام مهم به سوی عمیق تر شدن همکاری های تجاری میان افغانستان ، پاکستان و تاجیکستان ارزبابی شده است .
در این نشست مزمل شینواری سرپرست وزارت تجارت افغانستان گفت که امضای این توافقنامه گام مهمی برای هر سه کشور است و نقطه عطفی برای اقتصاد منطقه خواهد بود .
قرار است نشستی دیگری با حضور نمایندگان افغانستان ، پاکستان و تاجیکستان به منظور بحث و بررسی در مورد پیش نویس توافقنامه ترانزیت تجاری سه جانبه در ماه فبروری سال جاری میلادی در دوشنبه پایتخت تاجیکستان برگزار شود .